ལོག་རྟོགས་སྙིང་སྟོབས།

༆། ལོག་རྟོགས་སྙིང་སྟོབས།
ཚ་བ་མདའ་སྨྱུག་བརྩམ།
ལོག་རྟོགས་སྙིང་སྟོབས། ༡
རྟག་གེ་པའི་མིག་ནང་གི་ཆོས་ལུགས་ཀྱི་འཇིག་རྟེན།
དྲང་པོའི་གཏམ་གྱི་གཉའ་ནས་མི་གནོན་ཞིང་། ལོག་པར་སྨྲ་བ་ཡལ་བར་མི་འདོར་བ།
མདའ་སྨྱུག་རང་གི་དམ་ཚིག་དང་པོ་སྟེ། སྲོག་ལ་བབ་ཀྱང་འབད་པས་སྲུང་བར་ངེས།


གཅིག
ཆོས་མངོན་པའི་ལུགས་ཀྱི་སྣོད་བཅུད་གཉིས་ཀྱི་རྣམ་གཞག་ལ་དཔྱད་པ། སངས་རྒྱས་ཆོས་གཞུང་ནས་བཤད་པའི་འཇིག་རྟེན་སྣོད་བཅུད་གཉིས་ཀྱི་རྣམ་གཞག་ལ། མངོན་པ་གོང་འོག་གི་ལུགས། ས་སྡེ་ལྔའི་ལུགས། འཇིག་རྟེན་གདགས་པའི་ལུགས། སངས་རྒྱས་རྨད་བཅད་ཀྱི་ལུགས། བདེ་མཆོག་སྡོམ་འབྱུང་གི་ལུགས། དུས་ཀྱི་འཁོར་ལོའི་ལུགས་སོགས་རྣམ་གཞག་ཕྲན་ཚེགས་མི་འདྲ་བ་མང་པོ་ཞིག་ཡོད་པར་གྲགས་ཀྱང་། སྤྱིའི་ཆ་ནས་བཤད་ན་མངོན་པའི་ལུགས་དེས་མ་ཁྱབ་དང་མ་འཐུས་པ་གང་ཡང་མེད། མངོན་པའི་ལུགས་ཀྱི་འཇིག་རྟེན་ལྟ་ཚུལ་དེ་ནི་མི་ལོ་སྟོང་ཕྲག་མང་པོའིགོང་ནས་འཛམ་གླིང་ཤར་ནུབ་ཡོངས་ལ་ཁྱབ་པའི་བཤད་སྲོལ་སྙིང་པ་དེ་རང་ཡིན་པས་དེ་ཉིད་དེང་སང་གླེང་དགོས་པ་དང་གླེང་རིན་ཡོད་པ་ཞིག་རྩ་བ་ནས་མིན་མོད། རང་རེ་བོད་ཀྱི་མཁས་པ་ཕལ་མོ་ཆེ་ཞིག་གིས། དེང་གི་གནམ་རིག་པ་དག་དང་མི་འགྲིག་བཞིན་དུ་མཐུན་ཐབས་འཚོལ་བ་སོགས་ལྕེ་ཕར་བསྒྱུར་ཚུལ་བསྒྱུར་སྣ་ཚོགས་བྱས་ཏེ། ད་དུང་ཡང་རང་ལ་དག་པ་སྟེར་བའི་རེ་བ་རྒྱག་བཞིན་འདུག་པ་འདི་ནི་ཤིན་ཏུ་མི་འོས་ཞིག་ཡིན་པས། དྲང་པོ་མིན་པའི་སྨྲ་མཁན་ཁོང་རྣམ་ཚོ་རེ་ཐག་ཆོད་པའི་འཁྲུལ་མོ་རགས་ཙམ་ཞིག་སྤྲོད་པར་བྱའོ། དེ་ལ་སྣོད་བཅུད་ཀྱི་རྣམ་གཞག་གཉིས་ཡོད་པ་ལས། དང་པོ་རང་ཅག་མིའི་རིགས་རྣམས་ཐུན་མོང་དུ་འཚོ་ཞིང་གནས་པའི་གཞི་རུ་གྱུར་པའི་ད་ལྟའི་འཇིག་རྟེན་འདི་ཉིད་ཐོག་མར་གང་ནས་བྱུང་བའི་ཚུལ་ལ། ཆོས་མངོན་པ་བ་རྣམས་ལྟར་ན། སྤྱིར་འཇིག་རྟེན་གྱི་ཁམས་ལ་ཐོག་མ་དང་ཐ་མའི་མཐར་མེད་ཅིང་རྒྱ་ཚད་ཀྱང་གཞལ་དུ་མེད། ད་ལྟའི་འཇིག་རྟེན་འདི་ནི་འཇིག་རྟེན་གཞན་ཞིག་ཞིག་ནས་བར་གྱི་བསྐལ་པ་ཉི་ཤུ་ཐམ་པ་ལོན་པའི་རྗེས་སུ་ལས་ཀྱི་དབང་གིས་ཕྱོགས་བཅུའི་ནམ་མཁའི་ཁམས་ནས་རླུང་ཆེན་པོ་དག་ལྡང་སྟེ། དེ་དག་རིམ་གྱིས་ཕྱོགས་གཅིག་ཏུ་འདུས་པའི་མཐར་རྡོ་རྗེའི་ཁམས་ལྟར་སྲ་ཞིང་བརྟན་པར་གྱུར། དེ་ཉིད་མུ་མཐའ་མེད་པའི་ནམ་མཁའི་དབྱིངས་སུ་རྟེན་མེད་པར་ཆགས་ཤིང་། དབྱིབས་ནི་ཕྱི་རིམ་མཐོ་ལ་ནང་དམའ་བ་སྟེ་བར་སྣང་དུ་དཔྱངས་པའི་ཟོ་སྟོང་ཞིག་དང་འདྲ་པོ་ཡོད། དེ་རྗེས་རླུང་དཀྱིལ་དེའི་སྟེང་གི་ནམ་མཁའ་ལ་སྤྲིན་གྱི་ཕུང་པོ་ཆེན་པོ་འདུས་ཏེ་ཆར་རྒྱུན་ཤིང་རྟའི་འཕང་ལོ་ཙམ་ཡུན་རིང་དུ་བབ་པས། མཐར་ཟོ་བ་ཆུས་ཁེངས་པ་བཞིན་རླུང་དཀྱིལ་གྱི་དབུས་སུ་ཆར་ཆུའི་རྒྱ་མཚོ་ཆེན་པོ་ཞིག་ཆགས། མཚོ་དེའང་རླུང་ཤུགས་ཀྱིས་དབུས་བསྲུབ་ཅིང་དཀྲུག་པའི་དབང་གིས་འོ་མའི་ཐོག་ཏུ་སྤྲིས་མ་ཆགས་པ་བཞིན་ས་གཞི་ཆེན་པོ་རི་གླིང་དང་བཅས་པ་འདི་བྱུང་། དེ་ཐམས་ཅད་ཀྱི་བདག་རྐྱེན་ནི་རྒྱལ་བའི་སྨོན་ལམ་དང་། འགྲོ་བའི་ལས་དབང་གཉིས་ཡིན་ལ། ཉེར་ལེན་གྱི་རྒྱུ་ནི་འཇིག་རྟེན་གཞན་དག་ཞིག་པའི་ཐལ་རྡུལ་ཕྲ་མོ་དག་ནམ་མཁའ་འདིར་རླུང་གིས་ཁྱེར་ནས་འོང་བ་ཡིན། སྣོད་ལ་བར་བསྐལ་གཅིག་དང་། བཅུད་ལ་བར་བསྐལ་བཅུ་དགུ་སྟེ་འཇིག་རྟེན་རེ་རེའི་འཆགས་པའི་དུས་ཡིན་ནི་བར་བསྐལ་ཉི་ཤུ་རེ་དང་། བར་བསྐལ་རེའི་ཡུན་ལ་མི་ལོ་དཀྲིགས་ཆུང་བརྒྱད་ལྷག་ཙམ་ཡོད་ཟེར་ལ། དཀྲིགས་ཆུང་ནི་གྲངས་གནས་བཅོ་བརྒྱད་པ་དེ་ཡིན། དེ་ནས་བར་གྱི་བསྐལ་པ་ཉི་ཤུའི་རིན་ལ་འཕེལ་འགྲིབ་སྤེལ་མའི་ངང་ནས་གནས་པའི་མཐར་འཇིགས་པའི་འགོ་རྩོམ་ཞིང་། འཇིག་པའི་ཚུལ་ལ་མེ་ཡིས་འཇིག་པ་དང་། ཆུ་ཡིས་འཇིག་པ་དང་། རླུང་གིས་འཇིག་པ་བཅས་རེས་ཀྱིས་འཁོར་བ་ལས། ད་རེས་ནི་མེས་འཇིག་དུས་ཡིན་ཞིང་། འཇིག་རྟེན་འཇིག་པར་རྩོམ་པའི་ཚེ་ཉི་མའི་དཀྱིལ་འཁོར་འདི་ཉིད་ད་ལྟ་བས་བཞི་འགྱུར་གྱིས་ཚ་རུ་ཕྱིན་པའི་སྟེང་དུ། གང་ཞིག་ནས་ཡོང་མིན་ཆ་མི་འཚལ་བའི་ཉི་མ་གསར་པ་གཞན་དྲུག་བཅས་ཁྱོན་ཉི་མ་བདུན་དུས་གཅིག་ཏུ་ཤར་ནས་ས་གཞི་ཆེན་པོ་འདི་ཉིད་རྩ་སྐྱ་མེད་ནང་དུ་འཕངས་པ་ལྟར་གཞོབ་ཐུལ་དུ་བསྲེག་ཅིང་། མཐར་ཚིག་པའི་ཐལ་བ་ཙམ་ཡང་ཤུལ་དུ་མི་ལུས་པས་ཅང་མེད་ཀྱི་ནམ་མཁའ་སྟོང་རྐྱང་ཞིག་ཏུ་འགྱུར་བར་འདོད། རྣམ་གཞག་དེ་ཐམས་ཅད་ཀྱང་འཇིག་རྟེན་ལས་འདས་པའི་སངས་རྒྱས་ཀྱི་སྤྱན་ཞེས་བྱ་བ་དེས་དེ་ལྟར་དུ་གཟིགས་པ་ཙམ་ལས། གཞན་དེ་ལྟར་ཡིན་ངེས་པའི་འཐད་པ་བཙལ་ཏེ་སྨྲས་པ་ནི་ཅུང་ཟད་ཀྱང་མེད་དོ། ཕྱིས་ཀྱི་གནམ་རིག་མཁས་པ་དག་གིས་འདོད་པ་ལྟར་ན། སྤྱིར་འཇིག་རྟེན་ལ་མཐའ་ཡོད་མེད་གང་ཡང་མི་སྨྲ་སྟེ། ཐོག་མཐའ་ལ་དུས་ཀྱིས་བསྐལ་ཞིང་ཕ་མཐའ་ལ་ཡུལ་གྱིས་བསྐལ་པས་ཡོད་མེད་གང་ལ་ཡང་བློ་མི་འཇུག་པའི་ཕྱིར། ད་ལྟར་གནམ་རིག་གི་ཤེས་ཚད་ལྟར་ན་མ་འོངས་པར་ཡང་ཐག་ཆོད་པའི་རེ་བ་མཐོང་གི་མེད། ཡིན་ནའང་གློ་བུར་དུ་བློ་ཡུལ་ལས་འདས་པའི་བློ་སྐྱེད་འདྲ་བྱུང་བ་ཡིན་ན་ནི་བརྗོད་ཚུད་མི་ཐིག་སྟེ། སྔོན་ཆད་འོད་ལས་མྱུར་བའི་དངོས་པོ་ཞིག་ཤེས་བྱ་ལ་མི་སྲིད་པར་འདོད་ཀྱང་། ད་ལྟ་ཐོད་བརྒལ་གྱི་འགྲུལ་བཞུད་ལ་བརྟེན་ནས་འོད་ལོ་འབུམ་ཕྲག་མང་པོ་དུས་ཚོད་ཐུང་ངུ་རེའི་ནང་དུ་བགྲོད་ཐུབ་སྲིད་པའི་ཚོད་དཔག་བྱེད་ཀྱིན་ཡོད་པ་ལྟ་བུ་རེད། དེས་ན་འབྲི་གུང་གི་མཁས་པ་ར་སེ་དཀོན་མཆོག་རྒྱ་མཚོ་སོགས་ཀྱིས། སངས་རྒྱས་པས་འཇིག་རྟེན་མཐའ་མེད་དུ་བཤད་པ་དེ་དོན་ལ་གནས་པའི་ར་སྤྲོད་དེང་གི་གནམ་རིག་པས་བྱེད་ཀྱིན་ཡོད་ཅེས་གསུངས་འདུག་པ་ནི་མི་བདེན་པའི་གཏམ་དུ་ཤེས་པར་བྱའོ། འཇིག་རྟེན་སྤྱི་ཡོངས་ལ་འཆགས་པའི་དུས་ཚོད་འདི་ཞེས་འཆད་དུ་མེད་ཀྱང་། ད་ལྟ་མིག་དང་རྒྱང་ཤེལ་སོགས་ཀྱིས་མཐོང་ཐུབ་པའི་སྐར་ཚོགས་ཀྱི་ཆོལ་ཁ་འདི་ནི་ཆགས་ནས་མི་ལོ་ཐེར་འབུམ་བཅོ་ལྔ་ཙམ་ཞིག་སོང་ཡོད་པར་འདོད། དེ་ཡང་ཐོག་མར་སྟོང་ཆེན་གྱི་ཁམས་འདིར་ཐོགས་རེག་གི་དངོས་པོ་ཅི་ཡང་མེད་པར། གློག་གི་ནུས་ཁྱམས། ཁབ་ལེན་གྱི་ནུས་ཁྱམས། ལྗིད་ཀྱི་ནུས་ཁྱམས། ཚད་རྡུལ་ནུས་ཁྱམས་བཅས་ཤུགས་རིགས་མི་འདྲ་བ་བཞི་ཙམ་གྱི་ངོ་བོར་གནས་པ་ལ། གློ་བུར་དུ་རྒྱུ་མཚན་གང་ཡིན་ཆ་མ་འཚལ་བའི་འབར་གད་ཆེན་པོ་ཞིག་ཤོར་ཏེ་ཤུགས་རིགས་བཞི་པོ་སོ་སོར་གྱེས་ཤིང་། དེ་དག་ཕན་ཚུན་ཁྱབ་འཕྲོའི་འདུས་སྦྱོར་ལས་ཤིན་ཏུ་ཕྲ་བའི་གཟུགས་ཅན་གྱི་གསོབ་རྡུལ་མང་པོ་གསར་དུ་གྲུབ། སྐབས་དེར་དྲོད་ཚད་ཧ་ཅང་མཐོ་བ་དེ་རིམ་གྱིས་མར་ཆགས་པ་དང་བསྟུན་ནས་ཕྲ་རྡུལ་མི་འདྲ་བ་དག་ཀྱང་ཕན་ཚུལ་འདྲེས་སྦྱོར་བྱུང་སྟེ། རྒྱུ་རྡུལ། བར་རྡུལ། ཉིང་རྡུལ་སོགས་རིགས་དང་ནུས་པ་མི་འདྲ་བའི་རིལ་རྡུལ་མང་པོ་ཞིག་གསར་དུ་ཐོན། དེ་ལྟའི་ངང་ལས་མི་ལོ་དུང་ཕྱུར་གཉིས་ཙམ་འདས་རྗེས་ད་གཟོད་གདོད་མའི་སྐར་རྒྱུའི་སྤྲིན་ཕུང་ཆགས་ཤིང་། མི་རིང་བར་ཆེས་ཐོག་མའི་བརྟན་སྐར་དག་ཀྱང་འཆགས་པའི་འགོ་བརྩམ་པ་ཡིན་ཟེར། འགས་གཏོར་ཆེན་མོའི་གཞུང་ལུགས་འདིའི་ཁུངས་ནི་ཨ་རིའི་གནམ་རིག་མཁས་པ་ཧ་བོས་ཤིན་ཏུ་ལེགས་པའི་རྒྱང་ཤེལ་སྤྱད་ནས་རྟོག་ཞིབ་བྱས་པའི་གྲུབ་འབྲས་དེ་ཡིན། ཁོང་གིས་རྒྱང་ཤེལ་བརྒྱུད་ནས་ལྟ་སྐབས་སྐར་ཚོགས་ཡོད་ཚད་ཕན་ཙུན་བར་ཐག་ཇེ་རིང་དུ་འགྲོ་བཞིན་ཡོད་པ་དང་། དེ་ཡང་རྒྱང་ཐག་ཇི་ཙམ་རིང་བ་དེ་ཙམ་གྱིས་གྱེས་ཤུགས་ཀྱང་ཆེ་བར་འདུག་ཟེར། ད་ལྟ་ང་ཚོས་མཐོང་ཐུབ་པའི་འོད་ལོ་དུང་ཕྱུར་ཕར་ནང་གི་སྐར་འོད་དེ་དོན་དུ་མི་ལོ་དུང་ཕྱུར་ཡར་སྔོན་གྱི་སྐར་འོད་ཡིན་དགོས་པས། མི་ལོ་དུང་ཕྱུར་གཅིག་གི་ཡར་སྔོན་དུ་སྐར་མ་འདི་དག་ཕན་ཚུན་གྱི་བར་ཐག་ད་ལས་ཉེ་བ་དང་། དེ་དུས་སྐར་མ་ཕན་ཚུན་གྱི་གྱེས་ཤུགས་ཀྱང་ད་ལྟ་ལས་ཆེ་བ་ཞིག་ཡིན་པར་གོང་གི་རྒྱང་ཤེལ་གྱི་མཐོང་ཚུལ་དེས་ར་སྤྲོད་བྱས་ཡོད་པ་རེད། ད་ལྟ་འོད་ལོ་ཐེར་འབུམ་བཅུ་གཉིས་ཀྱི་སྐར་འོད་མཐོང་ཐུབ་པའི་རྒྱང་ཤེལ་བཟོས་ཡོད་ལ། ད་ལོ་ཉིས་སྟོང་བདུན་ལོར་ཨ་མེ་རི་ཀའི་ཁེ་ལི་ཧྥུ་ཉི་ཡའི་མངའ་སྡེ་རང་བྱུང་ཚན་རིག་ཞིབ་འཇུག་ཁང་གིས་འོད་ལོ་ཐེར་འབུམ་བཅུ་གསུམ་མཐོང་ཐུབ་པའི་རྒྱང་ཤེལ་བཟོས་ཡོད་ཅེས་གསལ་བསྒྲགས་སྤེལ་འདུག གལ་སྲིད་འོད་ལོ་ཐེར་འབུམ་བཅོ་ལྔ་ཕན་གྱི་སྐར་འོད་མཐོང་ཐུབ་པའི་དབང་དུ་བཏང་ན། འཇིག་རྟེན་ཁམས་འདི་ཐོག་མར་ཇི་ལྟར་ཆགས་པ་དང་། འགས་གཏོར་ཆེན་མོ་དེ་ཇི་ལྟར་བྱུང་བའི་ཚུལ་བཅས་མངོན་སུམ་དུ་མཐོང་ཐུབ་པའི་རེ་བ་ཡོད་པ་ཡིན་འདུག ད་དུང་དངོས་ལུགས་རིག་པའི་གཏན་སྲོལ་གྱི་སྟེང་ནས་ཀྱང་འཇིག་རྟེན་འདིའི་ཡབ་མེས་ནི་འགས་གཏོར་ཆེན་མོ་དེ་ཡིན་དགོས་པའི་གནས་ལུགས་འཆད་རྒྱུ་ཡོད་འདུག་མོད་ང་ཚོས་རེ་ཞིག་གོ་དཀའ་བར་སྣང་། ཉི་མའི་ཁྱིམ་རྒྱུད་འདི་ཆགས་ནས་མི་ལོ་ཐེར་འབུམ་ལྔ་ཙམ་དང་། ས་ཡི་གོ་ལ་ཆགས་ནས་མི་ལོ་ཐེར་འབུམ་ཕྱེད་ལྔ་ཙམ་སོང་ཡོད། མ་འོངས་པ་ན་མི་ལོ་ཐེར་འབུམ་ལྔ་ཙམ་གྱི་རྗེས་སུ་ཉི་མའི་འབར་རྫས་ཆིང་དང་ཧེལ་ཕལ་ཆེར་ཟད་ནས་དྲོད་ཚད་ཆུང་དུ་ཕྱིན་པ་དང་ཕྱོགས་མཚུངས། སྤུད་ཚད་ཀྱང་ཇེ་ཞན་དུ་གྱུར་པའི་དབང་གིས་དམ་ཚགས་ཤོར་ཏེ་ཉི་མའི་བོངས་ཚད་ད་ལྟ་ལས་ལྡབ་བརྒྱ་ཙམ་ཞིག་ཇེ་ཆེར་འགྱུར། སྐབས་དེར་ས་ཡི་གོ་ལ་སོགས་ཉི་མའི་ཁྱིམ་རྒྱུད་ཀྱི་སྒྱུ་སྐར་ཕལ་མོ་ཆེ་ཡང་ཁབ་ལེན་གྱི་རི་བོར་ལྕགས་ཕྱེ་འབྱར་བ་བཞིན་དུ་ཉི་མའི་ངོས་སུ་ལེན་པར་འགྱུར་ལ། དེ་ནས་སླར་ཡང་མི་ལོ་དུང་ཕྱུར་འགའ་ཞིག་སོང་རྗེས་ཉི་མའི་འབར་རྫས་ཡོངས་རྫོགས་ཟད་དེ་ཁྱིམ་རྒྱུད་ཧྲིལ་པོ་འདི་མུན་པ་མུན་ནག་འབའ་ཞིག་ཏུ་འགྱུར་བ་ཡིན་ནོ་ཞེས་ཟེར་རོ། ཚན་རིག་པས་བཤད་སྲོལ་འདི་དག་གི་ཁྲོད་ནས་འགའ་ཞིག་ཚོད་དཔག་ཙམ་ལས་ཁྱབ་མཐའ་ཆོད་པ་རང་མིན་ཡང་། གཞི་འཛིན་ས་ངེས་ཅན་རེ་ཡོད་པ་མ་གཏོགས་རང་གར་སེམས་ལ་གང་དྲན་ཁ་ནས་ཕུད་བཞག་པ་ཞིག་ཀྱང་མིན། དེས་ན་སྐབས་རེར་ཚན་རིག་པ་ཚོས་ཤེས་པ་ལས་ཀྱང་ཆོས་ལུགས་ཚོས་བཤད་པ་དག་ཞིབ་ཆ་ཆེ་ལ། གསལ་ཁ་དོད་པ་ལྟ་བུ་རེ་ཡང་སྣང་མོད་རྫུན་མའི་གཏམ་ལ་ཁུངས་ལུང་མང་། ཞེས་པ་ལྟར་ཡིན་པས་ཡ་མཚན་དང་ཡི་སྨོན་སྐྱེ་དགོས་དོན་མེད་དེ། མཁས་དབང་དགེ་འདུན་ཆོས་འཕེལ་གྱིས། མུ་སྟེགས་པའི་ལུགས་ཀྱི་ཞིང་ཁམས་དེ་ཚོར་ཁང་པ་ཆེ་ཆུང་ཇི་ཙམ་ཡོད་པ་དང་། ཁང་པ་རེ་རེའི་ནང་དུ་ཀ་བ་དུ་རེ་བསླངས་ཡོད་པ་དང་། ཀ་བ་རེ་རེ་ལ་རིང་ཐུང་དང་ཕྲ་སྦོམ་ཇི་ཙམ་ཡོད་པ་སོགས་རྣམ་གཞག་ཕྲ་མོ་ཚུན་ཆད་ཤིན་ཏུ་གསལ་ལ་ཚང་བར་བཤད་དེ་བླུན་པོ་ཚོའི་ཡིད་དབང་ཡོངས་སུ་འཕྲོག་འགྲོ་བ་ཞིག་བཟོས་བཞག་ཡོད། ཅེས་གསུངས་པ་ལྟ་བུ་ལས་མ་འདས་སོ། །
མུ་འགོད།
ཁོ་བོའི་དཔྱད་རྩོམ་འདི་ལ་ལན་ཐེབས་མཁན་ཡོད་ན་ཐོབས་ཤིག་དང་། སྙིང་ཐག་པ་ནས་དགའ་སུ་དང་ཡི་རང་ཞུ་ངེས་ཡིན། གལ་སྲིད་ལན་ཐེབས་མཁན་མེད་ན་ཉི་མ་དེ་རིང་ནས་བཟུང་སྟེ། གནམ་འོག་གི་ཆོས་པ་ཡོད་ཚད་དབུ་བཏུམས་ནས་བྲང་རྡུང་བཞིན་བཞུགས་པར་ཞུའོ། །
.

You have no rights to post comments

པར་སྐྲུན་བདག་དབང་གློག་རྡུལ་འཕྲུལ་དེབ་ཁང་ལ་ཡོད

Tibetan eBooks ©2011. All rights reserved